Kultur Etxe hau Urumea ibaiertzean dago kokatuta eta bere jarduera kulturala Loiola, Txomin Enea eta Martutenera zabaltzen du.

Antzina garbitegia zena handitu ondoren 1987. urtean ireki zuten Kultur Etxea eta aurki instalazioak berritzea aurreikusten da.

Etxearen kokalekuak, hots, Urumea ibaiaren ondoan, eta elkarteekin duen harremana nahiz hauekin batera egiten dituen ekimenek garrantzi handia dute Kultur Etxearen jarduera kulturaletan. Urumea ibaia beraren, folklorearen, memoria historikoaren, musika sakratuaren nahiz organo musikaren eta abarren topagunea da.